Chlaushock 21

Nach einem einjährigen Unterbruch fand am letzten Freitag der Chlaushock statt. Die stattliche Zahl von 35 Teilnehmern zeigt, dass der Wunsch, gemeinsame Zeit mit den "TVW-Vereinsgspöndli" zu verbringen, gross ist.

Fast wäre der 3G-Anlass jedoch kurzfristig ins Wasser gefallen, hats den Chlaus doch tatsächlich mit einer hartnäckigen Erkältung ins Bett gelegt. Zum Glück sind aber Sabrina, Nadine, Matth, Rolf und Renata eingesprungen, sodass der Hock wie geplant stattfinden konnte. Raphi hat sich sogar ultrakurzfristig als Chlaus zur Verfügung gestellt, weshalb die Anwesenden nicht einmal auf den obligaten Besuch, inklusive Schmutzli und Eseli, verzichten mussten - sogar einen kleinen Vers hatte der Ersatz-Chlaus parat! Natürlich durfte zum Abschlus auch das obligate Jahresrückblick-Sprüchli von Dauer-Chlaushock-Teilnehmer Max nicht fehlen.

Vom Chlaus nochmals ein grosses Dankeschön an alle, die kurzfristig eingesprungen sind!

Sprüchli Max:

Samichlaus, s’isch ned zum glaube

und es het mer tue de Schlof raube

scho zwoi Johr händ mer eus nümme troffe

me chönd meine du seigsch abgsoffe

Das isch natürli ned de Fall

denn vor zwoi Johr hets ge en Knall

d’Chinese hend verbreitet en Virus

wo hed verursacht en riese Zirkus

Selbst d’Schuele sind gange zue

und bis hüt händ mer eifach kei Rue

überall git’s die unsägliche Lockdown

seigs uf em Land oder in ere Town

die ganz Welt lauft nur no ume maskiert

und mänge isch dorum völlig frustriert

denn mer chönd nümme s’lebe gnüsse

geschweige denn es Schätzli küsse

Alpha, Beta, Gamma, Delta und no Omicron

das isch mittlerwil de wohri Hohn

ich ha gmeint es ischs griechisch Alphabet

schinbar esch das aber plötzli ned

Geimpft, genesen, getestet sind die drei Ge

Sosch häsch de Usgang gsee

das chömmer bald nömme ghöre

dorum dueni jetz mit Corona ufhöre

Es get schliessli no anderi aktuelle Sache

wo eus au no grossi Sorge mache

vorallem d’Klimaerwärmig geht eus z’dänke

wie chüemmer die i di richtige Bahne lenke

schienbar müend mer s‘Portmonee füre näh

au wenn das tuet schüli weh

de Strom, s’Gas und de Benzin wird immer türer

nur euse Lohn wird immer fühler

so cha das uf Dur nümme wieder gho

sosch muess de Konkursbeamte cho

denn au Bauprise werdet immer höher

das wird ja immer und immer wie schlimmer

Samichlaus, ich hoffe du hesch de gäge es Rezept

sosch ghei i no voll total us em Konzept

oder söl ich de liebe Schmutzli anspreche

öb er die Spirale cha endli unterbreche

d’Hauptsach isch mer send no fast gsund

und es lauft bald alles wieder total rund

de lömmer eus ned ufs Boxhorn jage

mer düend deswege au nid verzage

Im Sommer het mi troffe de Blitz

und zwar is Aug das isch kei Witz

ha müesse notfallmässig in Spital

ohni Operation wärs usecho fatal

Noch her han i rechts drü Woche nüd me gseh

Alles isch gsi wie unter emene schwarze Schnee

Nochher han i alles dopplet gseh

dezu isch s’mer ständig drümlig gsih

au hüt han i no grossi müeh met em luege

denn es blendet mi no immer i de Auge

wäg de Netzhutablösig gseni wie dur en Hülle

dorum träg i gäge d’Sonne e dunkli Brülle

Dank dere Unbill hani gseh im Fernseh viel Sport

Samichlaus fall mer wäge dem nid is Wort

d’Schwizer Nati het a de EM brilliert

und die arme Franzose grad echli grilliert

zwar händ mer au öpene en Penalty verschosse

das het die Spanier leider gfreut ganz unverdrosse

Schluss endli händ d’Italiener d’EM gonne

und sich somit chönne räkle i de Sonne

Mittlerwil händ mer eus chöne revanchiere

und i de WM-Quali d’Italiener abserviere

somit chönt mer definitiv go tschute uf Qatar

und zwar im ene Johr vor Wiehnacht fasch ned wahr

Endi Juli het d’Olympiade agfange

z’Tokio hend d’Plämpel um d’Häls ghange

vorallem eusi Frauepower hed brocht viel Wonne

d’Jolanda, d’Belinda und d’Nina händ Gold gonne

de Erfolg isch für euses Land schlichtweg grossartig

de Idruck isch vo mer us absolut ned abwegig

so chas a de nächste Winterolympiade witer go

noch em Motto hopp Schwiz und witer so

Jetz chom i langsam zum Schluss

Schliesslich möchte i nochli Nuss

Ich hoffe du hesch öpe ned Verdruss

sosch wäre bimeid nächstens duss

Max Hüsser